Директорот на Државниот завод за статистика, г. Апостол Симовски, одржа работна средба со амбасадорот на Франција, Н.Е. Сирил Бoмгартнер, на која се дискутираше за претстојниот Попис на население, домаќинства и станови, 2021. Амбасадорот се интересираше како течат подготовките за пописот, и како ќе се одвива целата операција на терен, бидејќи е од огромна важност за државата. Директорот го информираше за целиот тек на активностите и до која фаза се дојдени подготовките. Се очекува објавување на методологијаза за пописот до крајот на оваа недела и истата ќе биде презентирана пред јавноста на прес-конференција.
Исто така, на средбата се дискутираше и за методот на попишување и за базите на податоци кои ќе се користат при пописот. Директорот на Државниот завод за статистика, исто така, информираше дека е предвидена посебна апликација за само-попишување на македонските државјани кои живеат во странство подолго од 12 месеци, и истата ќе биде достапна од 1 март до 21 април.
Средбата со Амбасадорот на Франција помина во позитивна атмосфера, при што амбасадорот ја искажа својата увереност во максималната подготвеност и посветеност на Државниот завод за статистика да го подготви и спроведе Пописот на население, домаќинства и станови, 2021, а воедно ја нагласи и својата поддршка за целиот овој процес и изрази желба за натамошна соработка помеѓу амбасадата на Франција и Државниот завод за статистика.
Сите активности