Денес, директорот на Државниот завод за статистика, г. Апостол Симовски, и заменикот-директор, г. Илми Селами, остварија работна средба со министерот за надворешни работи на Република Северна Македонија, г. Бујар Османи.
Средбата беше посветена на подготовките за Пописот на населението домаќинствата и становите 2021, и улогата што Министерството за надворешни работи ја има во процесот на попишување на државјаните на Република Северна Македонија кои живеат или престојуваат во странство.
Ова е прв попис во кој се дава можност нашите граѓани во странство да се самопопишат и да дадат податоци за себе и за своите семејства – истакна Симовски и нагласи дека на ваков начин ќе добиеме реална слика за миграциските движења на нашето население што ќе биде добра основа за градење стратегии и политики за запирање на овој процес.
Министерот Османи истакна дека со цел да се даде максимална поддршка на овој процес на попишување кој е од национален интерес, Министерството за надворешни работи ќе ги мобилизира сите дипломатско-конзуларни претставништва со цел да ги информираат македонските државјани во странство за процесот на самопопишување.
Во периодот што претстои ќе бидат организирани и едукативни онлајн работилници за начинот на самопопишување, а двете институции ќе имаат заеднички тимови кои ќе работат на информирање на населението во странство за сите прашања поврзани со Пописот.
Сите активности