Според податоците на Државниот завод за статистика, во Република Северна Македонија се родени вкупно 18 790 деца, од кои живородени се 18 648, а мртвородени 142. Бројот на живородените деца во 2021, во споредба со минатата година, е намален за 2.0 %. Во структурата според пол, кај живородените деца машките имаат поголемо учество, и тоа 51.1 %, односно на 100 живородени женски деца 104.5 се машки. Според месецот на раѓање, најголем број раѓања има во месец јули, односно 1 735.
Според возраста на мајката, најголемо учество од 34.0 % имаат живородените деца од мајки на возраст од 25 до 29 години.
Просечната возраст на мајката при вкупниот број раѓања е 29.2 години, a 27.5 години кај првите раѓања.
Генерациската година на раѓање на мајката која се појавува како најфреквентна при раѓањето на детето е 1992 година.
Во 2021 година се регистрирани и 20 живородени деца од мајки на возраст под 15 години.
Бројот на вонбрачните живородени деца изнесува 2 546 деца, или 13.7 % од вкупниот број на живородените деца припаѓаат на вонбрачните.