Според претходните податоците на Државниот завод за статистика, бројот на активните деловни субјекти во Република Северна Македонија, во 2021 година, е 72 922 и во однос на 2020 година е намален за 0.2 %. Најмногу, за 2.6 %, се намалил бројот на активните деловни субјекти во секторот Уметност, забава и рекреација, додека најголемо зголемување од 13.6 % се јавува во секторот Снабдување со електрична енергија, гас, пареа и климатизација.
Податоците за структурата на активните деловни субјекти по сектори на дејност покажуваат дека во 2021 година најголемо учество имаат секторите: Трговија на големо и трговија на мало; поправка на моторни возила и мотоцикли со 30.0 % и Преработувачка индустрија со 10.9 %. Најмала застапеност имаат секторите: Снабдување со електрична енергија, гас, пареа и климатизација (0.3 %), Снабдување со вода; отстранување на отпадни води, управување со отпад и дејности за санација на околината (0.3 %) и Рударство и вадење на камен (0.3 %).
Податоците за структурата на активните деловни субјекти според бројот на вработените покажуваат дека најголемо учество од 82.0 % имаат деловните субјекти со 1 до 9 вработени. Потоа следат деловните субјекти без вработени или субјектите со неутврден број вработени (без податок за вработените) со 8.2 %, па субјектите со 10 до 19 вработени со 4.5 %, потоа субјектите со 20 до 49 вработени, чие учество изнесува 3.0 %, со 2.0 % учествуваат субјектите со 50 до 249 вработени и само 0.3 % од активните деловни субјекти имаат над 250 вработени.
Како резултат на процесот на усогласување на варијаблите во Статистичкиот деловен регистар со регулативата за деловни статистики (EBS Reg. 2152/2019), за 2021 година ќе се објават две соопштенија. Ова соопштение е подготвено врз основа на добиените претходни податоци, а во второто соопштение ќе се објават дефинитивните податоци (во почетокот на 2023 година).