Државниот завод за статистика го спроведува Пописот за земјоделство за да се изработи статистичкиот портрет на македонското земјоделство и неговите активности. Податоците што ќе се добијат од овој Попис на корисниците ќе им понудат сеопфатна слика за состобите во македонското земјоделство, односно релевантни информации за бројот на индивидуалните земјоделски стопанства, вкупниот користен земјишен фонд за земјоделство, рибарство и шумарство, добиточниот фонд по видови и по категории, земјоделската механизација и опрема, агротехничките мерки според видот и површината на земјиште на која се применуваат, работната сила ангажирана во оваа дејност и сл.

     На територијата на Република Македонија, по Втората светска војна се спроведени 2 пописа на земјоделството, во 1960 и во 1969 година.
Индивидуалните земјоделски стопанства, со определен број на белези, беа опфатени со пописите на населението кои беа спроведени во 1991, 1994 и 2002 година.

     Правен основ за подготовка, спроведување, обработка и дисеминација на податоците од Пописот е Законот за Попис на земјоделство (Службен весник бр. 39/2006 и 113/2006).

     Критичен момент : Пописот и Постпописното истражување ќе се спроведат според состојбата на 31 мај 2007 година и според состојбата во период од една година пред спроведувањето на Пописот (од 1 јуни 2006 до 31 мај 2007 година).

Период на спроведување на Пописот: 01-15.06.2007 година