Пописот е организиран според концептот на целосен опфат (“од врата до врата”) што значи дека за време на Пописот ќе бидат посетени и евидентирани сите домаќинства на територијата на Република Македонија со цел да се идентификуваат и опфатат единиците на Пописот. Идентификуваните единици на Пописот ќе бидат попишани од попишувачи по пат на интервју.

     Нема да се посетуваат деловните објекти (ако таму нема домаќинство), дипломатско-конзуларните претставништва и религиозните објекти.

     Предвидено е со Пописот да се опфатат и домаќинствата на раселените лица кои во критичниот момент ќе се затекнат во колективните центри за сместување на раселените лица во земјата, како и други домаќинства сместени во колективни живеалишта. Нивното попишување ќе го извршат лица вработени во Државниот завод за статистика.

     Со Пописот ќе се опфатат исклучиво индивидуалните земјоделски стопанства, домаќинствата кои поседуваат шума и домаќинствата кои поседуваат рибник на територијата на Република Македонија.

     Со Пописот ќе се опфатат и деловните субјекти и единиците во состав на деловните субјекти кои според претежната дејност се распределени во секторот Земјоделство,лов и шумарство, како и оние кои не се распределени во овој сектор, но вршат активности во овој сектор ( земјоделски училишта,казнено-поправни домови, земјоделски научни институти, верски заедници и други).